طالبان اوربند او سولې ته چمتو کیږي
افغان ګل
د طالبانو ځینو ویندویانو او پخوانیو چارواکو چې د طالب مشرانو لوړې کچې کړیو ته لاس رسی لري او له حالاتو خبر دي، له رسنیو سره څرګنده کړې چې په قطر او عربي اماراتو کې د طالبانو، افغان دولت او امریکايي چارواکو خبرې ډېرې بریالۍ وې او اوس طالبان تر بل هر وخته پر سولې او د خبرو پر نتیجه باوري شوي دي.
ویل کېږي چې په دې پړاو خبرو کې طالبانو خپلې غوښتنې مقابل لورو ته وړاندې کړي او له مقابل لورو یې هم مثبت ځواب ترلاسه کړی دی.
په دې ناسته کې د نورو ناستو پرخلاف د طالبانو دریځ ډېر نرم او عملي ښکارېده.
د باخبرو سرچینو په حواله، په دې ناسته کې طالبانو منلې چې نورې خبرې به په کابل کې ترسره کوي، د سولې یوه ګډه کمېته به جوړوي، دغه کمېټه به د سولې لپاره یو میخانیکیت رامنځته ګوي، ځانونه به پر حکومت نه تحمیلوي او د انتخاباتو له لارې به خپل استازي پارلمان او حکومت ته استوي، له هېواده د بهرنیو ځواکونو د وتلو لپاره به یو مهال وېش جوړېږي، د سولې وروستۍ پرېکړه به د امریکا، ناټو او ملګرو ملتونو د استازو او سیمه ییزو قدرتونو او هېوادونو لکه روسیه، چین، ایران، پاکستان، ترکیه او نورو له خوا لاسلیکيږي او دغه اړخونه به ژمن کېږي چې تر سولې وروسته به له افغان دولت سره مرسته کوي، مداخله به نه کوي او د پرېکړه لیک د ضمانت په توګه به کردار ادا کوي.
د سولې خبرو د مخته وړلو لپاره طالبانو درې بهیره لرل، د قطر، اسلام اباد او چین بهیرونه. د قطر بهیر تر نورو یو قدم مخکې دی، د چین او اسلام اباد بهبر له تر لوی اختر وروسته په کابل کې د قطر له بهیر سره یوځای شي او تر دې وروسته به ټولې خواوې خبرې د سولې د ګډې کمېټې له خوا پرمخ وړي.
تېره پنجشنبه د چین سفیر د ملي امنیت له سلاکار حنیف اتمر سره په همدې موخه وکتل. د چین سفیر یوه ورځ مخکې په ډاګه کړې وه چې له طالبانو سره یې په خبرو کې پرمختګ کړی، څه خبرې یې ورسره د مېز سرته رااېستلي او څه نورې لاهم د مېز لاندې دي.
په دې خبرو کې د چین سفیر وویل چې چین به د سولې په برخه کې خپله همکاري نوره هم زیاته کړي.
د تېرې یکشنبې په ورځ د طالبانو یو څلور نفري استازی د افغانستان په پاسپورتونو ازبکستان ته سفر درلود. په دې سفر کې پر سولې او په افغانستان کې د ازبکستان پر پروژو خبرې وشوې.
چین او روسیه هغه هېوادونه دي چې په افغانستان کې ژر تر ژره د جګړې پای ته رسول غواړي.
امریکا هم ژمنه ده چې تر راتلونکي کال په افغانستان کې د دایمي سولې او ثبات بنسټ کېږدي او په دې اړه د خپلو سیمه ییزو سیالانو همکاري او ضمانت هم له ځان سره ولری.
د قطر په خبرو کې پرېکړه شوې چې په لوی اختر کې به د جګړې د ټولو ښکېلو غاړو له خوا اوربند وشي، تر اختر وروسته به د اړوندو غاړو له خوا په کابل کې خبرې پیل شي او اوربند به ورسره دوام پیدا کړي. په پام کې ده دغه خبرې د اختر په څلورمه ترسره شي. تر دې خبرو وروسته به د طالبانو یو هیات کابل ته راځي، دفتر به ورته پرانستل کېږي، د سولې خبرې او میخانیکیت به وروستی کوي او د سولې د ګډې شورا پر جوړېدو به خبرې کوي.
د سولې ګډه شورا به دنده لري چې د سولې پرېکړې عملي کړي او د سولې له ټولې پروسې به څار کوي.
سره له دې چې نور په هېواد کې د سولې او جوړجاړي لپاره تر بل هر وخت لېوالتیا زیاته شوې او شرایط برابر شوي دی، خو بیا هم یوشمېر بهرني اغراض او پر ځینو طالب مشرانو یې اغېزې سبب کېدای شي د سولې بهیر وننګوي، خو د دې بهیر مخه نیول کېدای نه شي. په کار دا ده چې طالب مشران د سولې د خبرو پر وخت خپلې ډله ییزې ګټې شاته کړي او ملي مصالح په پام کې ونیسي.
افغان دولت هم باید د سولې د خبرو پر وخت نوې ننګونې او ګواښونه له نږدې وڅاري او پروخت یې ځواب ووايي.
انشالله سوله راتلونکې ده، خو د افغان ولس ټینګې ارادې ته اړتیا لري.
