د ښوونکي د نړیوالې ورځې په مناسبت د پلان فیوچر د رهبري پلاوي پیغام
موږ ددې ویاړمنې ورځې په مناسبت ښاغلو هیوادوالو، درنو ښوونکو، ګلالیو زده کوونکو او د پلان فیوچر روزنیز مرکز قدرمنو استادانو ته خپلې نېکې هیلې او مبارکۍ وړاندې کوو.
د ښوونکي دنده یوه تر ټولو مهمه، سپېڅلې او له ویاړه ډکه دنده او ښوونکي ته الله پاک داسې مقام ورکړی، چې په نړۍ کې له بل هېڅ مقام سره نه شي پرتله کېدای. ښوونکی د سمون، رښتیا، روڼوالي او سرلوړۍ بېلګه ده، ښوونکی د تمدن د کاروان سالار، د علم او کلتور د قافلې مخکښ، د پیغمبرانو وارث او د غوره انسانیت معمار دی، ښوونکی د ښوونې او روزنې د بهیر مهم رکن او د ټولنې د پرمختګ او ترقۍ تر ټولو اغیزناک محور دی، چې ټولنه پر مثبت لوري رهبري کوي، له همدې امله د ښوونکي لپاره یوازې دا ویاړ بس دی، چې د بشریت ستر لار ښود حضرت محمد (ص) خپل ځان ته ښوونکی ویلی او فرمایلي يې دي: (انما بعثت معلما) په تحقیق سره زه ښوونکی را استول شوی یم.
د ښوونکي د مقام لمانځل په حقیقت کې د پوهې، روښنايۍ، نېکمرغۍ، اخلاقو او معنویت ستاینه ده. ژوندي، ويښ او د پوهنې پر اهمیت پوه ملتونه تل د خپلو ښوونکو درناوی کوي او د هغوی عزتمن مقام ته په درنه سترګه ګوري. زموږ قدر پېژندونکی ولس هم هر کال د دې ویاړلي مناسبت درناوی کوي او د خپلو ښوونکو د روښانه کارنامو په ویاړ د مننې مراتب وړاندې کوي.
زموږ د ټولنې د ښوونیز او روزنیز نظام توسعه او پرمختګ په حقیقت کې د هغو ښوونکو په نه ستړي کېدونکو فعالیتونو، اخلاص، فدارکارۍ او ښوونیزو چارو کې نغښتې، چې هره ورځ په پوره خواخوږۍ او زړه سوي د ولس بچیانو ته په تېره په لرې پرتو سېمو کې زده کړه ورکوي.
موږ د حکومت څخه غواړو، چې د ښوونکو ژوند او هغوی ته د لوړو زده کړو د اسانتیاوو په برابرولو کې تر هڅه دمخه ډېر پاملرنه وکړي، څو دوی په ارام ذهن او په پوره وړتیا زموږ جنګځپلي ولس ته خدمت وکړي.
د پلان فیوچر رهبري پلاوي او کار کوونکي له دې فرصت څخه په استفادې یو ځل بیا درنو ښوونکو ته، چې د ټولنې خدمتګار، زیار کښ او فداکار قشر دی، ددوی د ویاړلې ورځې له امله د زړه له کومي مبارکي وایی.
درنښت
پلان فیوچر
