دسولې دسپيڅلي نامه څخه څنګه استفاده وسوه
بسم الله الرحمن الرحیم
که څه هم ماځان دسياسي اموروڅخه ترډيره لیري کړی دی اویوازي مي علمي کارونوته توجه کړي ده ليکني مرکي اوملاقاتونه مي شاته کړي دي خوداليکنه راته په دې خاطراړينه ده ترڅوسکوت دلالت پر رضاء باندې رانسي دیوه مسلمان په توګه دداسي عمده اشتباه په وړاندې خپل نفرت ښکاره کړم کوم چې دسولي هيلې په ناهيلۍ بدلوي، دګرانوهیوادوالواوهیواد دل اناامنۍ اوناخوالوسبب کیږي، همدارنګه دناپایه جنګ اورته لمن وهي
رشتیاهم قدرت ته درسیدلولپاره ځيني کسان ډیري وعدې کوې مختلفي حربي کار وي خوهدف ته په رسیدلوسره ځينې کسان کاملا لاره بدلوي، کله خپلي وعدې هیري کړي اوکله په چالاکی سره ورته غیرمقبول ځواب ووایي
زماپه اندچې اشرف غني اودهغه ټيم قدرت ته درسيدوسره يوځای أن په دوېمه ورځ هغو وعدو ته چې ګواکې دوی به خامخاهیوادته سوله راولي اویابه دده په قول که په دې کارسره بریالی نسي نواستعفابه ورکوې په عمل کې منفي ځواب ووايه،رښتیاچې دایوډيرسپيڅلی شعار وه ،هغوی په رښتياسره پوهيدل چې داکړيدلی ولس ترټولواول سوله غواړي، هغوی سولې ته تر بل هرڅه اړتیالري، هغوی دسولې راوستلو ته دومره تږي او انتظار دي لکه یو روژه نیونکی چې دګرم باد په ګرمواو لویو ورځوکې ماښام (روژه ماتي) ته تږی او انتظار وې، هغوی په دې سره هم پوهيدل چې داملت به خامخادهغه چاوشاته ودريږي څوک چې دسولې دسپيڅلي ډالۍ سره ورته ځان ښکاره کړي، مرسته به یې خامخاوکړي، که څوک ورڅخه دهمدې هدف دپلي کولولپاره مرسته وغواړي، خو دوی وهغه ته منفي جواب ووایه او اوله ابتدايې دچاخبره په ساکن سره سوله، هغه داچې دامریکاسره یې هغه ناروا اوغیر اسلامي تړون په ډیره بیړه لاسلیک کړکوم چې دسولې په لاره کې تر ټولو لوی مانع دی، د امريکا سره امنيتي تړون ترټولوعمده عامل دی چې دسولي سره مستقيما ټکرلري.
سوله چې کله هم اړینه سي مانایې داده چې دسولې لپاره چلینجونه سته او هغه باید دلاري دخنډ په ډول لیري سوی وای، چې یومهم چلینج هم دکفري ښکېلاک داشغال ګرو موجوديت او شتون دی، چې دسولې په لاره کې ترټولو لوی او ناانډوله چلينج دی، همداموجودیت دجنګ عامل اودسولې لپاره چلينج دی، که څه هم دګوتوپه شمیرکسان به د دوی دوجود څخه دځانونو په ګټه غیرمشروع استفاده کوي، خوداهیڅ کله دټولنې دحقوقوشرعي نماینده ګې نسي کولای، زه په دې باوریم ترڅوچې دبهرنیانو اشغال تر هر عنوان لاندي دوام لري، ترهغو به دسولې مخي ته غرونه پراته وي.
دحقوقي لحاظه هرافغان که هغه مخالف وي اوکه موافق وي دهیواد دارضي تماميت مالک دی، ددغه ملکیت څخه یې هيڅوک نسي محروم کولای، دهرافغان بي توافقه دهغوی پرخپل ملکیت باندي معامله کول یوازي دانه چې غیرقانوني ده بلکه ظلم دی چې دسیاسي رقابت په بنیادباندي منځ ته راځي او دیوه غوڅ اکثريت دمحروميت اومحکوميت دوام غواړي .
دشرعي لحاظه زه په دې عقیده یم چې دامریکاشیطاني قوت به هیڅ کله هم ویوه اسلامي هیوادته سوبه رانه وړي اوباالعکس به دقومونو سمتونو،خلکواوحکومتونو او حتی دوروڼو ترمنځ نفاق ته لمن ووهي چې ښه بېلګه يې خپله زموږ د هیواد دا ډول اوسنی عربي جریان دی،چې ټوله خون ريزي ، ويجاړونه، مرګونه او ترورونه د دوی (بهرنیانو) په مستقیمه یاغیرمستقیمه لاسوهونه اولمسون سره جریان لري، امریکا دکمونيزم ترماتې وروسته اسلامي نړۍ ترمستقیم هدف لاندي راوستلې ده او د هر هغه مسلمان په وړاندې محارب قوت کاروې چې ددوی دشیطاني دسیسوپه وړاندې عکس العمل ښیې.
په داسي حال کې چې امریکایانو په افغانستان کې تر يولک اوپنځوس زره زیات مسلمانان په شهادت رسولي دي، داسلامي شرايعو توهین يې کړی، په زرګونو هیوادوال یې دخپلوحقوقوڅخه محروم کړی دي، تر درې لکه زیات ماشومان يې بې پلاره کړي اویتيمان کړي دي، تر یولک زیاتي تورسرې يې کونډې اورنډې کړي دي، په مليونونو افغانان يې دکورونوڅخه شړلي یاکور پريښودلو ته مجبوره کړي دي، په زرګونو کلي یې دخاوروسره خاورې کړي دي اوتراوسه جریان لري اوداسي نور…
دامريکایانو ددوستۍ یاهمکارۍ داسي سند چې دافغانانودنیولو، توهینولو، بندي کولو، کورته ننوتلو آن د وژلو لاښه جواز ورکول سي هیڅ ډول قانوني اوشرعي جواز نه لري، او داسي قرارداد که فرد کوي، که يې ټولنه کوي، که یې مسؤل اوغیرمسؤل کس کوي، دقران اوسنت لخوا مردود دی او زه یې دیوه مسلمان اوافغان په صفت نه دمسلمانانو په ګټه بولم، نه یې دسیمي اوثبات لپاره په ګټه بولم، بلکه دادسولې اوثبات دنه راوستلو، دجنګ داوږدولو، د فرقه یې، سمتي اونورو نفاقونو د ډيریدلو عامل ګڼم، له همدې کبله یې غندنه په سختو ټکو سره کوم.
په درناوي
عبدالسلام ضعيف
