آزاد قضاوت
باطل ته به حق نه وایو ، باطل به باطل بولو
قاتل ته به خپل نوم آخلو ، قاتل به قاتل بولو
له ډاره به نور،توروته د سپینو ویل پریږدو
عالم ته به عالم وایو،جاھل به جاھل بولو
د ښه اوبد په منځکی خوتوپیرکول په کاردي
ناقص ته به ناقص وایو،کامل به کامل بولو
الحاج الھام الدین قیام
والدورف/جرمنی
۱۹/۰۴/۲۰۱۴
افغانه
ترڅوبه د غفلت په خوب ویده یی رابیدارشه
په سوداوزیان دی ځان پوه کړه افغانه لږھوښیارشه
ترڅوبه په خپل کورکی د پردیومزدوري کړی؟
د پلار،نیکه په څیردی بیاد خپل وطن بادارشه
ترڅوبه دی دپلار،نیکه پګړۍ د بل په سرږدي؟
د پلار، نیکه پګړۍ ته دی پخپله سزاوارشه
ترڅوبه دی د پلار،نیکه میړانه د ژوندویاړوي؟
د پلار، نیکه لمسیه ! اوس پخپله لکه پلارشه
منم دی چی پلرونه دی زمونږد تاریخ ویاړدی
خوته ھم د پلروپه څیر،ددی وخت افتخارشه
پردیو دی وطن ته د تورتم لښکرراوستی
ځلانده لکه لمرشه،دی تورتم ته روڼ سھارشه
پردیودی وطن په یرغلونو،وران ویجاړکړو
اوس پاڅه،په میړانه د خپل وران وطن معمارشه
پردیودی ولس واړه د مرګ په لارو بوتلو
د ژوندپه لاریی تګ ته اوس مخکښ علمبردارشه
پردي ټول مطلبیان دي ، یارانه یی مطلبي ده
پردۍ یارانی پریږده ، بیاد خپلوخلکویارشه
کارغانودی د ښکلي ګلشن،ښکلي ګلان چورکړل
کارغان له ګلشن وشړه،د خپل ګلشن مالیارشه
مظلوم،جګړه ځپلي،خوارملت ته سوله راوړه
د جنګ په ضد قیام وکړه،د سولی پرچمدارشه
الحاج الھام الدین قیام
والدورف/جرمنی
۰۶/۰۳/۲۰۱۴
