د پیاوړي پوهیال او غښتلي فرهنګ پال، د ادب او فرهنګ روښانه او ځلانده ستوري ډاکټر ببرک ارغند د مړینې تریخ او دردوونکی خبر
په ډیر خواشینۍ سره خبرشوم، چې زموږ د هیواد په علمي او ادبي ډکر کې وتلې او پیژندل شوې داستان او کیسه لیکونکې، ، ټولنیزپوه، سیاست پوه، ادب پوه، منلی او ملي شخصیت ارواښاد ډاکټر ببرک ارغند په هالند کې له دې فاني نړۍ څخه د تل لپاره سترګې پټې کړې.
(انالله وانا الیه راجعون)
شاعر وایي :
څوک د ځان لپاره مړ شي نوم یې ورک شي
د چا مرګ د ټول ولس د پاره مرګ وي
د ډاکتر صاحب ببرک ارغند مړینه زموږ د هیواد په ادبي او فرهنګي، علمي، سیاسي او ټولنیز ډګر کې یوه لویه ضایعه ده.
خدای بخښلی ډاکتر ببرک ارغند پر (۱۳۲۵) لمریز کال په یوه منوره، درنه او پتمنه کورنۍ کې د کابل په ښار کې زیږیدلی دی.
ده خپلې زده کړې په بلخ، کابل او کندهار کې د باختر، حبیبیه او میرویس هوتکي په لیسو کې او لوړې زده کړې یې د کابل پوهنتون د ادبیاتو او بشري علوم په پوهنځی کې پای ته رسولی دي، او د بلغاریه په هیواد کې د صوفیه په پوهنتون کې یې د ژورنالیزم په برخه کې د ډاکټری دیپلوم تر لاسه کړې دی.
خدای بخښلی ډاکټر ببرک ارغند زموږ دهیواد په علمي، ادبي او فرهنګي ډګر کې د ( دري) ژبې د هغو نوښتګرو، مخکښو او نامتو لیکوالو څخه دی، چې د ده په غوره لیکنو او ارزښتناکو داستاني آثارو کې ډیر لوړ علمي مفاهیم، انساني ، ټولنیز، ملي او ادبي تصورات او افکار په ډیره خوږه ، سلیسه، ساده او روانه ژبه بیان شوي دي . د ده په لیکنو او داستانونو اوکیسو کې هنري ښکلا، خیالونه، سیمبولونه، تصویرونه، زموږ د اولسونو په ژوند باندې د واکمنو دودونو، عنعنوي ارزښتونو، پاک او سپیڅلي انساني احساسات، جذبات او عواطف ادبي او اخلاقي پیغامونه په ډیر رنګین او ظریفانه بڼه انځور شوي دي.
لنډه دا چې ارواښاد داکټر ببرک ارغند د خپلو علمي، ادبي او هنري هلو ځلو او خدمتونو په وسیله د علم، ادب او فرهنګ ډیوې تل بلې ساتلې وئ . د ده په لیکنو او ګټورو داستاني آثارو کې ادبي او هنري رنګ، خوند او ښکلا له ورایه معلومیږي . د د ه ملې ، وطني او انساني اهداف او احساسات د هیواد والو او د ادب او فرهنګ د مینه والو په ذهنونو او زړونو کې ژوندي پاتی دي او د ده شخصیت ته د علم، ادب او سیاست مینه وال په ډیره درنه سترګه ګوري.
دی یو پاک او سپیڅلې انسان، ریښتینې عالم، ادیب، نامتو ژورنالیست، داستان او کیسه لیکونکی، او پیاوړی لیکوال وُ. دی د تقوا او پرهیزګاری دروند شخصیت او د لویې حوصلې خاوند وُ. هر وخت غلې او خاموش ښکاریده، متواضع، حلیم، برده باره او بی کبره انسان و. ده د خپلو ملګرو، هیواد او هیوادوالو سره د انسان او انساني کرامت سره سپیڅلې او ژوره مینه درلوده.
زه د دغه ستر ماتم په غمجنو شیبو کې د ارواښاد ډاکټر صاحب ارغند درنې کورنۍ ،دوستانو، ملګرو او د افغانستان فرهنگي کړیو ته د دغې سترې ضایعې له امله د صبر، زغم او تسلیت مراتب وړاندې کوم او د لوی خدای څخه مرحوم ته د فردوس جنت غواړم.
د ګران او منلي ستر شخصیت ډاکټر صاحب ببرک ارغند اروا ښاده او یاد یې تلپاتې غواړم.
په ډیر درنښت : انجنیر عبدالقادرمسعود
