د پاکستان نوې لوبه
په داسې حال كې چې هند غواړي نوي ډیلي ته د ولسمشر غني د سفر په لړ کې افغانستان ته نوره پوځي مرسته اعلان کړي؛ افغان طالبانو له هنده وغوښتل چې د افغانستان حکومت ته وسلې او جنګي څرخکې ورنه کړي. طالبانو په یوه خبرپاڼه کې ويلي «اسلامي امارت دا اقدام په کلکو ټکو غندي، دا ډول اقدامات به د دوو هیوادونو د ولسونو ترمنځ بې باوري زیاته کړي او د اړیکو د لا زیاتې خړپړتیا سبب شي.» دا خبر پاکستانۍ ورځپاڼې ډيلي ټايمز خپور کړی او د طالب وياند زبيح الله مجاهد له خولې وايې «د کابل له حکومت سره د وژونکو وسلو مرسته زموږ د هیواد له خلکو سره دوستي نه بلکې د بهرنیو تر ملاتړ لاندې جنایتکارې ډلې ملاتړ ګڼل کېدای شي او په زغرده زموږ له خلکو سره دښمني ده.»
هند په دې ورستیو کې د افغانستان پوځ ته څلور ام ۲۵ هلیکوبترې ورکړې چې د افغان ځواکونو سره د هغوي په ځمکنیوو عملیاتو کې مرسته وکړي. دغه راز هند هرکال د افغان ملي امنیتي ځواکونو په سلګونو سرتیري په خپلو پوځي اکاډمیوو کې روزي. همداشان ټاکل شوې چې هند نوي ډیلي ته د ولسمشر غني د سفر په لړ کې افغانستان ته نوره پوځي مرسته هم اعلان کړي. ويل کيږي د افغانستان له لوري د هند حکومت ته د نویو وسلو لیست، چې اضافي څرخکې، درانه وسایط، زغرګاډي او پُرزې پکې شاملې دي، سپارل شوی دی. هند مخکې لا ویلي چې د افغانستان د حکومت له لوري د غوښتل شویو وسلو لویه برخه به دغه هیواد ته ورکړي.
اوس پوښتنه دا ده چې وسله والو طالبانو څنګه له افغان حکومت سره د هندوستان له پوځي مرستې سره غبرګون وښود؟
پر افغانستان د تاريخي دښمن له خوا تپل شوې جګړه لا نوره هم پسې اوږده شوې او افغان ولس نږدې هره ورځ د دې جګړې قرباني وركوي، د افغانستان د پرمختګ دښمنان هڅه کوی چې دلته د جګړې ډګر تود وساتي او دوی ترې خپلې مستقيمې او غير مستقيمې ګټې ترلاسه کړي. د غه کړيو د افغان وژنې جګړه کله د مجاهد په نامه ، کله د طالب په نامه او کله د داعش په نامه پر مخ بيولې ده. تاريخ ثابته کړې چې د دغو اورپکو تر شاه د نورو استخباراتي کړيو تر څنګ د پاکستاني پوځ او استخباراتو لوی لاس دی. پاکستان په مستقيمه توګه دغه جګړه له پاکستانه رهبري کوي او هره ورځ د لسګونو افغانانو ژوند اخلي. په تير کې مجاهد او اوس طالب او داعش د آی ايس آی غلامان دي. دوی ته چې د پاکستان لخوا هر امر کيږي؛ دوی يې پرته له ځنډه عملي کوي. په ټوله کې ويلای شو چې د اوسمهال د طالب په خوله کې د پاکستان ژبه ده. پاکستان چې ورته هر څه وايې دوی يې ترسره کوي.
اوس چې له افغانستان سره د پوځي مرستو ورکولو په غبرګون کې وسله والو طالبانو له هنده غوښتنه کړې چې افغان حکومت سره پوځي مرسته ونه کړي؛ د دې تر شا هم د پاکستان لاس دی. ځکه د کابل ـ ډهلي اړيکې تر بل هر وخت اوس ډيرې نيږدې شوي او پاکستان له دغې حالته ډیر ځوريږي. طالب خو د افغان وژنې لپاره د پاکستان پخوانۍ پروژه ده، دوی د پاکستان د استخباراتو د سازمان سره نيږدې اړیکې لري او د هغوي څخه هدایت اخلي. اوس چې پاکستان د افغان ـ هند له نيږدې اړيکو کړيږي؛ نو غواړي له افغان حکومت سره بله لوبه وکړي او د خپل غلام طالب په مرسته له افغانستان سره د هندوستان د پوځي مرستو مخنيوی وکړي.
که طالبانو له هندوستانه له افغانستان سره د پوځي مرستو د نه ورکولو خبر د پاکستان په اشاره او لارښوونه نه وي کړی نو بیا طالبان ولې خپله اعلاميه پاکستاني رسنيو ته استوي؟ د قضيې اړخونه خو افغانستان او هندوستان دي؛ طالبانو ولې خپله اعلاميه هندي يا افغان رسنيو ته نه استوله؟ همداشان د طالبانو اړوند خبرونه تر ډیره نور لوی نړيوال خبري اژانسونه لکه رويټرز او الجزيره نشروي؛ دوی ولې دغو اژانسونو ته خپله اعلاميه نه استوله چې پاکستاني رسنيو ته يې ورکوله؟
د پاکستاني رسنيو لخوا د وسله والو طالبانو د يادې اعلاميې خپرول همدا په ډاګه کوي چې طالبانو هيڅکله په خوښه او زړه له افغانستان سره د هندوستان د پوځي مرستو په مقابل کې غبرګون نه دی ښودلی بلکې د پاکستان په اشاره يې ياد کار ترسره کړی دی.
لیکنه : خوشحال آصفي
