د غني بله کارنامه
په داسي حال کي چي په افغانستان کي د ملکي خلکو تلفات ، د امنیت ترینګلتیا، بیکاري، په راتلونکي د خلکو بې باوري او کړکیچن حالات د یو ريکارډ تر کچې رسېدلي؛ ناامنۍ او د افغانستان د اقتصادي ودې لویدو؛ ډیر شمیر افغانان دې ته اړ کړي دي چې خپل هیواد پریږدي او په اروپا کې د یوه ښه ژوند په لټه شي. د افغانستان د کډوالو او راستنېدونکو چارو وزارت د معلوماتو له مخې، سږ کال له هېواد څخه ٧٠ زره کسان اروپا ته په قاچاقي توګه تللي ، چې ډېرى برخه يې ځوانان تشکيلوي. دغه شمیر افغانان په اسانۍ اروپا ته نه دي تللي بلکه هر یو یې خپل ژوند په خطر کې اوچولی، ډیری یې په سیندونو کې د ماهیانو او په غرونو او ځنګلونو کې د ځناورو خوراک شوي دي، رنګارنګ مشقتونه او سختۍ يې ګاللي دي، ولږه، تنه، ساړه هوا او ترینګلي اقلیمي حالات یې په ځان تیر کړي او ډیرو ته خو د اروپا سفر آن د ژوند په قیمت تمام شوی دی. دوى د بې عدالتۍ، بې وزلۍ او بيکارۍ له امله افغانستان پرېښى او اروپایي هیوادونو ته تللي دي. سره د دې چې دغو کډوالو په ډیرو سختیو اروپایې هیوادونو ته ځانونه رسولي خو اسو د المان حکومت پریکړه کړې چې افغان کډوال به بیرته خپل هیواد ته راوشړي. د یوې آلمانۍ ورځپاڼې د رپوټ پر بنسټ د آلمان حکومت غواړي په راتلونکې کې ډیر شمیر افغان کډوال بیرته خپل هیواد ته واستوي. د المان حکومت ددغې خبر په غبرګون بیا د افغانستان د کډوالو او راستنیدونکو وزیر سید حسین عالمي بلخي، وایي چې افغانستان له آلمان سره یو دوه اړخیزه هوکړه لیک لري چې د کډوالو اجباري اخراج یې خلاف دي. له دې هاخوا دردونکې خبره لا دا چې افغان ګډ حکومت هم له المان سره د افغان کډوالو راشړل منلي دي.
اوس په داسې حال کې چې افغان ګډ حکومت په اروپایې هیوادونو کې د افغان کډوالو غم نه خوري؛ په تازه کې د ګډ حکومت مشر اشرف غني ویلي چې حکومت یې له اروپایي هیوادونو څخه د بیرت ستنیدونکو افغان کډوالو راتګ مني. د آلمان خبري سرچینو د راپورونو پر اساس د دغه هیواد د بهرنیو چارو وزیر فرانک والتر شتاین مایر، د تیرې جمعې په ورځ له افغان ولسمشر محمد اشرف غني، سره ټلیفوني خبري کړي دي. په دغو خبرو کې دواړو چارواکو د افغانستان د کډوالو او راستنیدونکو چارو د وزیر سید حسین عالمي بلخي، د وروستیو څرګندونو په اړه بحث کړی دی. د راپورونو پر اساس افغان ولسمشر شتاین مایر ته ډاډ ورکړی دی چې د بلخي وروستۍ څرګندونې د هغه شخصي نظر دی او د ده د حکومت موقف نه ښيي. سرچینو ویلي دي چې ولسمشر غني په خپلو خبرو کې روښانه کړې ده چې افغانستان په دې برخه پر خپلو نړیوالو مسئولیتونو خبر دی.
اوس خلک پوښتنه کوي چې ای د ګډ حکومت مشره غني..!
ته د کومو نړیوالو اصولو خبرې کوې؟
تاسې د یو ولسمشر په حیث او شریکوال دې (عبدالله) د کورنیو اصولو پر اساس په کور دننه له اروپا راستنیدونکو کډوالو لپاره څه کړي دي؟
تاسې، ستا شریکوال او ستاسې ګډ حکومت ددغو کډوالو لپاره چې دلته یې خپل مال او حال خرڅ کړي؛ څه لازم چمتو والی نیولی دی؟
تاسې او ستاسې ګډ حکومت به دوی اوس چیرته استوګن کړي، دوی به اوس په کوم کار بوخت کړۍ؟
دغه له اروپا راستنیدونکي کډوال خو پر ځای پریږده دلته د موجوده کاري ځواک (ځوانان) لپاره دې څه وکړل؟
دا سمه ده چې د نړیوالو اصولو پر اساس هر هیواد مکلف دی چې خپل اتباع ومني خو افغانستان داسې یو امن هیواد نه دی چې وګړي یې بیرته واستول شي. دلته حالات سم نه دي او د ناامنیو ګراف لوړ دی ځکه نو تاسې باید له الماني حکومت سره د افغان کډوالو د اخراج اړوند په خپله پالیسۍ له سره کتنه وکړۍ. تاسې باید له الماني حکومته وپوښتنۍ چې ولې د سوریې کډوال قبلوۍ او افغان کډوال راشړۍ؟ که په سوریي کې د ناامنیو او د داعش د موجودیت له کبله د دې هیواد کډوال په آلمان او نورو اروپايي هیوادونو کې له ډیرو ستونزو پرته منل کیږي. له دې سترې امنیتي ننګونې او بیکارۍ خو په افغانستان کې اوج ته رسیدلي دي، د داعش ډله د افغانستان په ختیځو برخو کې هم حضور لري. داعش دلته هره ورځ ناامنیو ته لمن وهي، انسانان وژني او اعداموي یي.
زمونږ دغو کډوالو افغانانو په ډېرو ستونزو ځانونه اروپا ته ورسول، ژوند يې په خطر کې واچاوه، که واېستل شي له افغانانو سره به هم ستاسې او هم د الماني حکومت له لوري ستره جفا وي.
لیکنه : خوشحال آصفي
