د داعش خونه ړنګه کړئ، خو ولس يواځې مه پريږدئ
وروسته له هغې چې په ختيځ ولايت ننګرهار کې د داعش ترهګرې ډلې پر خلکو ناتار جوړ کړ؛ تيره ورځ په دغه ولايت کې افغان سرتیرو د داعش وسله والو ځپلو له پاره هوايي او ځمکني چاڼيز عمليات پيل کړل. د ۲۰۱سیلاب قل اردو ویاند ډګروال شیرین آقا په وینا؛ په دې عملیاتو کې بهرني ځواکونه هم له افغان ځواکونو سره مل دي. د ننګرهار امنیه قومندانۍ ویاند حضرت حسین مشریقوال وايی؛ عملیات به ترهغې روان وي، چې ټولې سیمې له داعشیانو پاکې شوې نه وي. ياد عمليات د ننګرهار په کوټ او هسکه مېنه ولسوالیو کې د داعش ترهګرې ډلې پر ضد ترسره کيږي. دا لومړی ځل نه دی، چې په یادو ولسوالیو کې د داعش د ځپلو لپاره دا ډول عملیات پیلیږي، له دې مخکې هم دوه ځله ورته عملیات تر سره او ګڼې سیمې پاکې شوي؛ خو، چې سرتېري ترې په شاه شوي بېرته په کې داعش پوځي مرکزونه جوړ کړي دي. هسکه مېنه او کوټ د ننګرهار هغه دوه ولسوالۍ دي، چې اوس هم ډېرې سیمې د داعش په ولکه کې دي.
له دې وړاندې هم حکومت په ننګرهار کې د داعش پر ضد پراخ عملياتونه ترسره کړي دي خو مثبته پايله يې موقتي وه او وروسته له څو مودې به په يادو سيمو کې داعش د دويم ځلي لپاره خپريدل. په لومړيو کې چې دغه ترهګره د طالب د ايډيال دښمن په توګه رادبره شوه نو حکومت هم د طالب د تضعيف د فکتور په توګه بلله. وروسته کله چې يې په ننګرهاري ولس ناتار جوړ کړ، د خلکو کورونه يې وسوځول، ځوانان او سپين ږيري يې په بمونو والوزول او ماشومان يې په منځ دوه ټوټې څيرې کړل نو حکومت يې پر ضد پراخ عملياتونه پيل کړل چې په نتیجه کې يې دغه ډله د موقت لپاره نابوده شوه او ځينې يې د پاکستان طرف ته واوختل. وروسته له عملياتو چې امنيتي ځواکونه له سيمې راووتل نو داعشيانو له فرصته ګټه پورته کړه او يو ځل بيا يې په ولس کې خپل وحشت خپور کړ. دا ځل يې ولسونه د پاڅونوالو په نوم وربړول او ووژل.
يعنې ويلی شو چې په تير کې هم حکومت په ننګرهار کې د داعش د ځپلو لپاره پراخ عمليات ترسره کړي او په کې يې داعشيانو ته درانه تلفات اړولي خو د څه مودې په تيريدو له داعشه پاکې شوې سيمې بيرته همدغې ډلې ته په لاس ورغلي او بيا يې پر ولس د وحشتونو څپه خپره کړې. دا ځل حکومت وايې چې دغه عمليات به د نورو هغو په پرتله ګټور وي. د ننګرهار والي ویاند عطاالله خوږیاڼی وايي، دا عملیات له تېرو هغو سره پرتوپیر پیل شوي او پایله به یې هم ډاډمنه وي. د نوموړي په وینا؛ په دې عملیاتو کې به پاکې شوې سیمې د ملي امنیت ریاست په همکارۍ پاڅونوالو ته سپارل کیږي او د سیمې د بیارغونې پروژې به په کې پلې هم شي.
حکومت خلکو ته د ډاډمنې امنيتي فضا د رامنځته کولو ژمنه ورکوي خو اندېښنه دا ده که د عملياتو په پايله کې له داعشيانو پاکې شوې سيمې يو ځل بيا په يواځې ځان ولس ته پريښودل شي؛ پايله به يې د تيرو عملياتو په څېر وي او له څه مودې وروسته به بيا يادې سيمې داعشيانو ته په لاس ورشي. ځکه په دغه ولايت کې د لومړي ځل لپاره د داعش پر ضد عمليات نه ترسره کيږي بلکې له دې وړاندې هم ورته عمليات ترسره شوي دي خو د حکومت د بيغورۍ له امله پاکې شوې سيمې بيرته داعش نيولي او له څه مودې وروسته هماغه ډول او هماغه ژرنده برابره شوې ده.
په تير کې چې حکومت د داعش پر ضد عمليات ترسره کړي په کې دغې ترهګرې ډلې ته درانه تلفات اوښتي، سيمې ترې پاکې شوي او د اوسيدو سيمې يې نيول شوي دي خو وروسته له څه مودې چې حکومت يادې سيمې په يواځې ځان پاڅونوالو ته پريښې نو داعش پرې بيا غلبه کړې. حکومت ته دا ځل په کار دي چې خپلې تيرې تجربې تکرار نه کړي. حکومت بايد له تيرو تجربو په ګټې اخيستنې په هغو سيمو کې اوسمهال له داعشيانو سره دي؛ له عملياتو وروسته په کې امنيتي پوستې جوړې او اضافي امنيتي ځواکونه دې په کې ځای پر ځای کړي. همداراز د ولس او پاڅونوالو ملاتړ دې وشي، دوی ته دې وخت پر وخت حکومتي مرستې ورسيږي.
لیکنه : خوشحال آصفي
