امريکايي ورځپاڼې تېرو څو ورځو کې د نوي افغان حکومت له لورې دوی ته د شپنيو عملياتو د اجازې خبر ورکړی او د دوی غوښتنه او خوښي يې برسېره کړې. ولسمشر دغه څرګندونې نه تاييد او نه رد کړې، خو وروسته په يوه خبرپاڼه کې چې د ارګ له خوا خپره شوې وه، وويل شول چې امريکايان به شپني عمليات نه کوي. د شپنيو عملياتو خبره لا ګونګه ده، چې بیا هم د همدې امريکايي ورځپاڼې له لورې، په ۲۰۱۵م کال کې د جګړه ييز ماموريت د دوام خبرې خپرې شوې.
غربي ميډيا نه يوازې د اوباما له لورې د پټ لاسليک شوي امر خبرونه خپاره کړل، بلکې ويې ويل چې د جګړه ييز ماموريت دوام د افغان حکومت غوښتنه او هيله ده!
په افغانستان کې د ايساف قومندان جنرال «جان کمپبل» وويل، چې «ولسمشر غني نړيواله ټولنه مني». دی وايي، «موږ اوس داسې ستراتيژيک فرصت لرو، چې د پخواني ولسمشر د واکمنۍ پر مهال مو نه لاره». ياد قومندان همدا رنګه نيويارک ټايمز ته په يوه لېږلي برېښناليک کې ويلي، «د پخواني او اوسني ولسمشر تر منځ توپير د شپې او ورځې تر منځ توپير دی».
امريکايانو په افغانستان کې په تېر دولس کلن حضور کې چې د پوځ جوړول په کې له ډېرو مهمو لاسته راوړنو بولي، افغانستان ته يې تر اوسه هوايي ځواک نه دی جوړ کړی. دا چې افغان حکومت يا افغان ځواکونه له امريکايانو د مرستې او هوايي بريدونو د دوام غوښتنه کوي، لامل يې له دوی سره د دغه ځواک کمی دی.
نيويارک ټايمز ته افغان جنرال ويلي چې دوی هوايي ځواک نه لري، او که له دې ځواکه پرته وجنګېږي، مرګ ژوبله به يې ډېره وي. دی وايي چې افغان ځواکونه د امريکايي پوځيانو مرستې ته لا هم اړتيا لري.
دا په دې معنا چې امريکايانو په تېر ديارلس کلونو کې د افغان ملي ځواکونو اړتياوې نه دي پوره کړي، څو دوی لا هم د امريکا مرستې ته محتاج وي او د امريکايانو جګړه دوی ته حياتي اهميت ولري.
خو بايد دا هم هېره نه شي، چې پخواني ولسمشر ولې په دې وروستيو کې د امريکايانو په وړاندې ودرېد او تر پخوا ډېر سپين غږېږي؟ لامل يې همدا د امريکايانو پڅه مرسته او ناقص لاسنيوی دی. ولسمشر کرزي له دوی سره ډېر وخت تېر کړی او تر نورو يې ښه پېژني. ځکه يې نوی حکومت ته په وروستۍ ورځ د امريکايانو په مقابل کې د احتیاط توصيه وکړه.
د امريکايي پوځيانو شپني عمليات او د بې درېغه بمباري وه چې ولسمشر يې تر دې اندازې مجبور کړ، چې امريکايان د «يرغلګرو» په ګواښ وګواښل.
اوس نوی ولسمشر هاغه څه له امريکايانو غواړي چې کرزي په ډېره موده کې په ډېرې خوارۍ بند کړل. دی اوس د شپنيو عملياتو په شدت او د هوايي ځواک د استعمال غوښتنه کوي، ځکه يې امريکايان همکار او د دوی له پاره ښه فرصت ګڼي.
خو تر هغې چې اوسنی ولسمشر د دې بمباريو او عملياتو په ضرر پوهېږي او په دې پوه شي چې د ګټې پر ځای يې تاوان ډېر دی، او بیا له امريکايانو سره د دې د بندولو له پاره چنې وهي، ښه به دا وي چې اوس دا خطر احساس کړي او له دې ډول غوښتنو تېر شي.
افغانان ولسمشر غني ته هيله من وو، خو د حکومت لومړۍ دوه مياشتې او د نيويارک ټايمز دغه جريحه کوونکې څرګندونې به د ولسمشر او افغانانو تر منځ د بې باورۍ فضا رامنځ ته کړي او د افغانانو هيلې به په ناهيلۍ بدلې کړي.
بيا که له بمباريو او شپنيو عملياتو وروسته، ولسمشر امريکايانو ته ځولۍ نيسي، بيا به دی همکار نه وي او امريکايان به يې د کرزي په څېر له شپې سره تشبېه کوي.
ژمن
