څه وکړو !
مولانا داکتر محمد سعید « سعید افغاني »
زما په نظر لازمه ده چه د تعلیم و تربیی پروګرامونو سره ، د اخلاقي پانګه ته باید ډیره اساسي توجه وشي ؛ ځکه دلته لاڅه چه په ټوله دنیا کښی اخلاقي پانګی خرابیږی، او څومره چه په تخنیکي ، صنعتي ، زراعتي او نور بخشونو کښی پرمختګ شوی دی ، هغومره د اخلاقي مهمی پانګی سره بی اعتنائي کیږی.
نو راځی چه مخکی دهغه نه چه زمونږ د اخلاقي پانګی دارائی ټوله برباده او دلاسه و لاړه شي ؛ یوتربله سره په صادقانه ډول کینو او یوتربله په سلیم عقل او منطق ، خبری ته غوږ و نیسو، تعمیق وکړو چه زمونږ د خلکو د خیر او فلاح د پاره څه وکړو.
بل اساسی ټکی دا دی چه :
په یو قوم او جمعیت کښی بی اعتنائی او بی اعتمادی دواړه مزمن او تباه کونکي امراض دي ؛ نو د پوه او خیرخواه شخصیتونو ایماني ډنده دا ده ترڅو د تفاهم ، اعتماد او اخلاصمندی ریښی قوي وساتی او د بی اعتنائی مرض سره چه د تباهی موجب ګرځی ، په معقوله او د ښه سالم منطق پربنیاد ؛ د خپلو د خیر او سلم اخلاقي مجادلو ته په دوامداره ډول ، قوت او شدت ورکړي.
سعید افغاني
د سرطان میاشت ، د ۱۳۳۷ هجري شمسي کال ــ ننګرهار
