د ملاعبدالسلام ضعیف پر کور برید چا وکړ؟!
نظرمحمد مطمئن
لیکوال او شناند
تر ډیره لا هم پخواني طالبان په کابل او نورو سېمو کې د پخوا په ډول بې پروایې لري. ډیر ځله ملاعبدالسلام ضعیف ته د بېلابېلو سرچینو لخوا ویل شوي وو چې په تګ راتګ کې احتیاط څخه کار واخلي.
د ضعیف صاحب د کور سره (احسان مېنه، بګرامي) نږدې مدرسه او لوی مسجد دی، هغه چې کله په کور وي پنځه وخته لمونځ حتی الامکان په جماعت سره کوي. د ماخستن لمانځه ته هم مسجد ته ځي. فرض لمونځ په جماعت کوي او بیا بیرته ډیرځله تر نورو لمونځ کوونکو مخکې راوځي او پاتې لمونځ پر کور کوي.
برید کونکو خپلې موخې ته د رسیدو لپاره همدا وخت ټاکلی وو، تر څو د ضعیف صاحب په بې پروایې او یواځیتوب کې هغه په نښه کړي. ولي داچې هغه په همدې شپه ( ۲۳ ډسمبر ۲۰۱۶ ) کابل ښار کې میلمستیا ته بلل شوی وو، نو په خپل کور کې موجود نه وو.
د ماخستن له جماعت وروسته متصل همهغه وخت چې نور وخت به ضعیف صاحب کورته راتلی، بریدګرو د هغه د کور پر ساتونکو برید کړی. د برید جزیات د امنیتي ملحوظاتو له مخې نه شو په ډاګه کولای، یو ساتونکی وژل شوی.
ډیر ژر د ضعیف صاحب سره اوسیدونکي ملګري او کلیوال له خپلو شته وسایلو سره له کورونو راوتلي او د بریدګرو تعقیب یې کړی. برید له دوو لورو شوی، موټرسایکل سپاره او پیاده خلک په سېمه کې لیدل شوې.
د ضعیف صاحب ملګري او نږدې کسان په دي اړه څه نه وایې چې بریدګر به څه ډول خلک وي، او ولي به یې موخه دی ګرځولی وي.
ضعیف صاحب وایې چې له هیچا سره شخصي ستونزه نه لري، او نه هم د کوم شخصي ادرس او یا ډلې لخوا څخه تر دي مهاله د تهدید او یا خطر احساس ورته شوی.
د شپې مهال د کلي خلک او د ضعیف صاحب ملګري مخکې له دي چې امنیتي کسان سيمې ته راورسیږي، هڅه يې کړي چې برید کوونکي پيداکړي، ولي نه دي توانیدلي.
داچې له هیواده بهر ځینو رسنیو راپورونه ورکړي چې ضعیف صاحب ژوبل شوی، ناسم راپورونه دي، او دغه ډول راپورونه د بېلابېلو غرضونو او هدفونو لپاره ورکول شوې.
هغه مهال چې د ضعیف صاحب پر کور برید کیدی، موږ یوه ډله ملګري په کابل ښار کې میلمانه وو، او یوځای وو، سمدستي ملګري او مشران د برید په اړه خبر شول او امنیتي ادارې هم خبرې شوې.
اوسمهال هم ښاغلی ضعیف صاحب له خپلو ملګرو او دوستانو سره یوځای دی، الحمدلله کومه امنیتي ستونزه نشته، تر دې مهاله ورسره مهم اشخاص په اړیکه کې دي، تر څو د برید څیړنه وشي.
هیڅ چا هم د برید پړه په غاړه نه ده اخیستي او ممکن څوک یې واهم نه خلي. د برید اړوند څیړنو ته به انتظار ولرو. داچې له دي مخکې ددغسي پېښو اړوند څیړنو نتیجه نه ده ورکړي، ممکن دا هم ورته يوه پېښه او څیړنه وي، ولي داچې د ضعیف صاحب کورنۍ او ملګري به هم د پيښې اړوند خپل معلومات راټولوي.
داسي ښکاري چې کوم افغان مشران د سولې او امن لپاره هڅې کوي، هغوی یو په بل پسې پخوا هم په نښه شوې، اوس هم په نښه کيږي او بیا به هم په نښه کيږي، ترڅو جګړې په هیواد کې دوام پیدا کړي او د پردیو هیوادونو پوځي شتون او د هغوی موخو ته د رسیدو لپاره لاره هواره پاتې شي.
په کورونو برید کول که د هر لوري لخوا وي، ناسمې پایلې لري، او بلاخره شخصي دښمنیو ته لاره هواروي، ښکېل اړخونه باید ددغسي پېښو د مخنیوي لپاره عملا قدمونه واخلي.
یادونه: انځور د لیکنې تر بشپړ کیدو وروسته له ښاغلي ملاعبدالسلام ضعیف صاحب څخه اخیستل شوی.
