کومه سوله ؟
سوله د ورونو ترمینځ خیر او د سلا خبر ده
جنګ، تربګني ده جهالت دی د ریا خبر ده
دښمن د سولې تر نامه ځانله فرصت لټوي
نه د اخلاص نه انسانیت نه د رښتیا خبر ده
دا چې غلیم زمونږ د ژوند ټوله هستيٍ تباه کړه
صرف په ظاهره یې دوستي اود وفا خبر ده
دا څو لسیزې دي چې مونږ په نن سبا غولوي
په مونږ د ظلم ، قصاوت بې انتها خبر ده
ترڅو په خپله په ځان رحم نکړو نه رحمیـږو
سوله، یووالی، ورورګلوي د مدعا خبر ده
دا کوم ناتار چې مو په کلو اوبانډو تیریږي
دا د بې رحمه، پردي پالو نا روا خبر ده
راځئ چې خپلو کې یو موټی یو قوت شو سره
والصلح خیر کې ژوند د دین او دنیا خبر ده
—————————————
سمیع الدین افغاني
۱۲/ ۸ /۲۰۱۸
م۰ کال
