دښاغلي مجیب الرحمن خطیبي شاعرۍ ته یوه لنډه کتنه
د سمیع الدین افغاني لیکنه
د زړګي چیغه مې دعا شي چې بس ته په زړه شې
قلم د واره په ژړا شي چې بس ته په زړه شې
مجیب الرحمان خطیبي
درنو او د قدر وړ لوستنکو!
د رړه درد تر سر لیک د ښاغلي مجیب الرحمان خطیبي د شعرونو نوې ټولګه ده چې څه برخه یې دشاعر په وینا منظم او څه نور یې ازاد شعرونه دي چې د شعر اوادب مینه والو ته یې وړاندې کوي ۰
ملګرو ! څه مده د مخې زما څخه په یوه رادیویې مرکه کې یو دوست زما سره یو نظر شریک کړ او وی ویل یې چې په دې ورستیو لسیزو کې شعر او شاعري زیاته شوې او د شعر په کیفیت کې هم تر کومه کچې چې لازمه ده د شاعرۍ معیاري بڼه کمزورې ښکاري ستاسو په دې اړه نظر څه دی؟
ما په ځواب کې ورته وویل:
زمونږ په ګران هیواد افغانستان کې د څو لسیزو را پدې خوا تپل شوې جګړه روانه ده او هره و ورځ زمونږ هیواد وال دمرګ ،ژوبله ، اجباري مهاجرتونو او د لسګونو نورو تراژیدویو شاهدان دي ۰د هیواد په ګوټ ګوت کې د نفاق ، شقاق او بې باوریو لړیو ته لمن وهل شوې چې په داسې یو حالت کې به داسې با احساسه انسان په خاصه توګه افغان نه وې چې د حالاتو نه متاثر شوی نه وي بنا همدا دلیل دی چې دافغانستان خلک په خاصه توګه ځوانان او د قلم خاوندان لاس په زنه ناست نه دي او د قلم په ژبه یې د خپل زړه درد او الام د خپلوهیواد والو سره د خپل وسې او استعداد په اندازه شریک کړی دی ۰
دوهمه اساساسي خبره داده چې هیڅوک شاعر دونیا ته نه دی راغلی او هر شاعر به یو لمړنی یا ابتدائي پړاو تیروي تر څو ښه او معیاري شاعرترې جوړ شي او که دنویو هغه ځوانانو شاعران په اشعارو کې د لسو شعرونوڅخه یو یا دوه هم د هیوادوالو د پام وړ وګرځي دا به هم دخپلې ژبې په معیاري کولو کې یو ښه قدم او خدمت وي چې د قلم دلارې یې تر سره کوي۰
رابشو اصل مطلب ته:
په رښتیا هم په تیر څو لسیزو کې زمونږ په جنګ زپلي هیواد کې لیکوالي او شاعرۍ ته خاصه پاملرنه شوې ده چې په همدې سلسله کې دادي دهیواد ځوان او هاند شاعر ښاغلي مجیب الرحمان خطیبي د« زړه درد » تر سر لیک شعري ټولګه چاپ ته اماده او په نژدې راتلونکي کې به د ادب مینه والو په خدمت کې وي۰
په دغه شعري ګلبڼ کې د شاعر د خاطراتو رنګارنګ ګلونه شته چې د غزل ، لنډی ، چهار بيتې ، لوبې ،بګتئ ۰۰۰په بڼه راوستل شوي دي۰
ښاغلی مجیب الرحمان خطیبي با تقوا ، متدین ځوان شاعر دی چې د لوی خالق په ستاینه کې داسې وایي:
نه قلم وه نه داستان وه ته وې ربه
نه دا ځمکه نه آسمان وه ته وې ربه
چې د نور مينه پټه وه حجاب کى
نه کوم سوزاو نه هجران وه ته وى ربه
شاعر د خپلې مینې په وصف کې وایي:
یو خوا لافى ستا دمينى صبح او شام کړم
بل خوا تګ اغيار کوڅى ته تل مدام کړم
ښه پوهيږم چې مې زړه،ځيګر سوځيږي
ولې بيا مې لـه شرابـو نـه ډک جـام کړم
په بل ځای کې شاعر د بې باوریو نه شاکي دی د خپل دردیلي زړګي راز په اړه داسې وایي:
داد پټ زړګي مې راز چاته بيان کړم
سوزيدلى د زړه حال چاته عيان کړم
چې له درده مى يو سوز په زړه کى راشى
بیا له قهره چيغى پورته تر اسمان کړم
همدا رنګه شاعر په دغه شعري مجموعه کې د درد ،درڼا په تمه ،بی وفا دنیاګۍ، ګیله ،زړګیه،د زمانې بڼه اونورو ډیرو سرلیکونو تر عنوان خپلو شعرونو ته ځاي ورکړی چې هیله ده د لوستونکو د توجه وړ وګرځي ۰
دې سره زه خپلې خبرې راټولوم ، ښاغلي مجیب الرحمان خطیبي ته د دغه شعري ټولګې د چاپ مبارکۍ تر څنګ هغه ته د اوږد عمر او د پوره بریاوو هیله د لوی خدای له درباره څخه لرم ۰
د شاعر د شعر یوه بیلګه :
د زړه راز
د اد پټ زړګي مې راز چاته بيان کړم
سوزيدلى د زړه حال چاته عيان کړم
په روښانه ورځ مى لاره کى تورتم دى
نه پوهيږم دا تورتم څنگه روښان کړم
دژوند بوستان مې ډک شو داغزيو نه
د اغزیو بڼ به مې څنگه گلستان کړم
حال د زړه مى چاته هيڅ ويلى نشم
دادزړه پرهار به چيرته زه درمان کړم
چې له درده مى يو سوز په زړه کى راشى
بیا له قهره چيغى پورته تر اسمان کړم
بخت به ښه شى ز مجيب پدى يقين یم
رحمتونه به د خداى په ځان باران کړم
——————————-
پای
